文／曾馨慧，客語薪傳師，係新屋客家人，這下戴到桃園（海腔腔）
「新娘車來咧！新娘車來咧！負責放炮仔个、兜水果个，煞煞準備好勢來，還過家娘、家官愛出來迎接新娘咧！」這係大伯公个聲，全莊聲胲最大，也係這擺結婚典禮負責人、大總管。
突然間叔伯老弟走等來講：「伯公、伯公，家娘、家官打早就無看著乜尋毋著咧！」大伯公大嫲牯聲回應講：「煞煞去尋！」𠊎本來還在該疑狐，阿公阿婆仰會囥在穀倉肚，原來係無中意這個滿妗，因為佢兜心肝肚，早就認定屋下這個細細揇來个滿姑，愛留來分滿叔做餔娘、做心臼个。
滿妗係楊梅黃屋有錢人，又係教書先生，身胚無盡高、面圓圓、笑容盡得人惜。在民國三、四十年該量時，細妹人做教書先生，係盡了不起个事情，更加係做心臼最好个人選，但係阿公、阿婆仰還會無中意呢？逐擺就看著佢兩儕人面皺目𥍉，還噥噥哢哢緊講：食飯（shidˋ pon+）就食飯，又麼个食飯（siid fan）；你好（ngi hoˊ）就你好，又麼个你好（nˇ hoˋ），全聽毋識愛仰般形來過日仔！原來這個滿妗有來過屋下兩擺咧，係因為佢講个腔調無共樣，互相嗄無法度溝通。
滿叔乜係學校个教書先生，屋下這個滿姑人盡恬，對阿公、阿婆盡有孝，透日茶來飯來，總知煞猛做屋下事。毋過正單淨有國民學校畢業定定，滿叔無合意，兩儕人也罕得有話講，所以佢決定毋管爺哀个反對，強強愛討這個黃小姊做餔娘。
滿妗嫁過來後，也知家娘、家官無合意佢，教書下課轉屋，總係囥在間肚，等到家娘、家官出門正有出來。手尖、腳幼个滿妗，雖然毋會做麼个事，但佢个笑容、誠意分人感覺當溫暖。𠊎最暢个係，佢會教𠊎唱歌、認字，還會講古分𠊎聽。過後伙房屋這兜細人仔，下課時總係帶等功課來寫、來問，大人還會帶等青菜、魚仔、肉來承蒙滿妗，儕儕都阿腦佢个善良、愛心，慢慢仔阿公、阿婆也接受這個心臼咧。
現下社會，係多元族群文化融入个大熔爐，單淨客家腔調就有四、海、大、平、安五隻腔，大家愛互相學習、互相參考，共同發展為目標，毋好分其他族群來看笑話，客家人有強烈語言認同感，當重視宗親个團結，共同堅持个信念「硬頸、堅忍、融合个精神」，期待大家共下煞猛打拚，摎客家話、客家文化發揚到全世界。
華語
新娘車來了，新娘車來了。負責放鞭炮的、端水果的，趕快準備好，還有婆婆、公公的也要準備出來迎接新娘了！這是大伯公的聲音，他是全村嗓門最大，也是今天結婚典禮負責人—大總管。
突然堂弟跑過來說：伯公、伯公，婆婆、公公一大早就沒看到人四處也找不到！大伯公大聲回說，趕快去找！我本來還在疑惑，爺爺奶奶為何會躲在穀倉裡，原來是不喜歡這個嬸嬸，因為他們的心中，早就認定家裡從小抱來的小姑姑，要給小叔叔當老婆、做媳婦的。
小嬸嬸是楊梅黃家有錢人，又是學校老師，身高沒很高、臉蛋圓圓的、笑起來非常可愛。在民國三、四十年那時候，女生當上老師，是件了不起的事，更是當媳婦的最佳人選，但為何爺爺奶奶會不喜歡呢？每次都看到他們兩人面帶憂慮煩惱的樣子，還常竊竊私語說：食飯（shidˋ pon+）就食飯，又是什麼食飯（siid fan）；你好（ngi hoˊ）就你好，又是什麼你好（nˇ hoˋ），完全聽不懂要如何一起過生活呀！原來這個嬸嬸已有來過家裡兩次了，只因為她講的腔調不同，互相沒辦法溝通。
小叔叔也是學校老師，家中這個小姑姑很安靜不多話，但對爺爺、奶奶非常孝順，每天是茶來飯來，總是用心做好家裡的活。但她只有小學畢業而已，小叔叔不喜歡，且兩個人也很少有話說，所以他決定不管父母反對，一定要取這個黃小姐當老婆。
嬸嬸嫁進門後，知道婆婆、公公不喜歡她，每天放學下課回到家，總是躲在房間裡，直到婆婆、公公出門才出來。細皮嫩肉的嬸嬸，雖然不會做家事，但她臉上的笑容、真誠讓人感到很溫暖。我最高興的是，她會教我唱歌、認字，還會講故事給我聽。之後伙房屋的孩子們，下課時總會帶著功課來寫、來問，大人還會帶著青菜、魚、肉來感謝小嬸嬸，每個人都讚賞他的善良、愛心，慢慢的爺爺、奶奶接受這個媳婦了。
現代社會，是多元族群文化融入的大熔爐，僅僅客家腔就有四、海、大、平、安五種腔調，大家要互相學習、互相借鏡，以共同發展為目標，不能讓其他族群來看笑話，客家人是有強烈語言認同感，非常重視宗親的團結，有共同堅持的信念「硬頸、堅忍、融合的精神」，期待大家一起認真打拚，把客家話、客家文化發揚到全世界。
