文／王德兆，新竹縣竹東人，已退休（海陸腔）
𠊎細个時節，台灣還係一隻農業社會，大部分个人都係耕種人，毋係耕田斯係耕山耕埔，做到會死收入又毋多，日仔無好當豐湧，斯生活過得去定定，哪有麼个娛樂摎休閒活動。後來臺灣對農業社會慢慢仔轉型變到工業社會，該量時个輕工業像電器、紡織摎塑膠等發展當遽，通過出口政策臺灣經濟成長緊來緊好，百姓个收入跈等提高，正開始有娛樂活動像看電視、看電影、聽廣播這兜，該量時「雲州大儒俠 史豔文」係全臺灣最有名个。
下後演唱會、音樂會正慢慢時行，室內肚个演唱會抑係音樂會該斯像看電影樣愛買票正做得落去聽个哦！慢慢仔各縣市政府逐年過年過節个時節正開始辦理戶外大型表演會，邀請有名个明星、歌手等去表演分大家看，餳來烏麻戰笪个遊客，尖到企腳就毋得。有兜鄉鎮乜有辦理音樂會，像竹東鎮公所逐年放避暑摎寒假个時節，長下會辦理音樂會分鎮民做得有機會聽毋使錢个音樂會，不但做得培養音樂人才乜做得提高鎮民个音樂素養。
有一擺竹東鎮公所在樹杞林活動中心辦一場音樂會，邀請兩隻交響樂團共下表演，節目精彩。𠊎兩公婆興蹀蹀走等去聽，一去啊到又乜係烏麻戰笪个人，連隻位仔斯難尋，尋來尋去正尋著左手析最尾排个兩隻位仔，坐下來毋幾久斯有一個後生阿爸渡等厥倈仔大約3、4歲左右，無位仔咧斯坐在𠊎位仔脣頭个碫仔項，音樂會正開始無幾久，佢兩子爺斯嘀嘀嘟嘟講無停，𠊎請佢兜演奏个時節毋好講話，細人仔聽毋識又坐毋核，佢兩子爺又嘀嘀嘟嘟講毋停，𠊎請佢兜毋好講話，愛講話出去外背講，佢嗄應𠊎講：「毋歡喜做得莫聽啊！這係毋使錢个，無你花錢買票去其他所在聽啊！」。𠊎想講聽音樂會，臺頂在該演奏个時節毋好講話，這毋係基本个規矩乜？這係對表演者个尊重，乜係對其他聽眾个尊重。仰會有一個恁後生个阿爸講出恁樣个話？佢个觀念摎態度會仰般影響著佢个倈仔？
麼个安到「規矩」？麼个安到「文明」？守法、守禮，這毋係基本道德乜？《禮記·中庸》：「莫見乎隱，莫顯乎微，故君子慎其獨也」。 意思係講君子在自家一儕、無人監督个時節，還係做得謹慎嚴格約束自家个言行。規矩像排列仔、讓位仔、在公共場所低言細語，像日本人見看著十字路口，不管佢有紅青燈抑係無紅青燈，不管有人抑係無人，佢一定會停下來看一下正駛走，這下臺灣乜有規定咧；日本細學生仔在看著有人駛車仔停下來分佢兜先過个時節，佢兜行過斑馬線以後一定會對駛車个人行禮，這斯係規矩，知仰般尊重別人，佢兜係從細斯開始教、開始做，難怪日本係先進國家，毋係佢兜个人民平均收入高定定，係佢兜个文明程度、道德个程度較高，對人有基本个尊重。聽音樂會毋講話係基本个規矩，自家係毋曉得尊重別人，又愛仰般教自家个子女尊重別人呢？一隻無規矩又毋曉得尊重別人个社會毋係一隻好个社會，規矩愛對自家做起，還要教細人仔遵守規矩，正會有機會變成文明社會，先進國家。
華語
我小的時候，台灣還是一個農業社會，大部分的人都是農人，不是耕田就是耕山耕埔，做得要死收入又不高，生活沒有富足，就生活過得去而已，哪有什麼娛樂和休閒活動。後來臺灣從農業社會慢慢地轉型變成工業社會，那時候的輕工業像電器、紡織和塑膠等發展很快，通過出口政策臺灣經濟成長越來越好，百姓的收入跟著提高，才開始有娛樂活動，像看電視、看電影、聽廣播等等，那時候「雲州大儒俠 史豔文」是全臺灣最有名的。
然後演唱會、音樂會才開始慢慢流行，室內的演唱會或是音樂會那就像看電影一樣要買票才可以進去聽的喔！慢慢地各縣市政府每年過年過節的時候才開始辦理戶外大型表演會，邀請有名的明星、歌手等去表演給大家看，吸引了密密麻麻的遊客看表演，人多擠到連腳都站不穩。有些鄉鎮也有辦理音樂會，像竹東鎮公所每年放暑假和寒假的時候，時常會辦理音樂會給鎮民可以有機會聽免費的音樂會，不但可以培養音樂人才也可以提高鎮民的音樂素養。
有一次竹東鎮公所在樹杞林活動中心辦一場音樂會，邀請兩個交響樂團一起表演，節目精彩。我倆夫妻興沖沖地跑去聽，一進去又是密密麻麻的人，連個位子都很難找，找來找去才找到左手邊最後排的兩個位子，坐下來沒多久就有一個年輕爸爸帶著他兒子大約3、4歲左右，沒位子了就坐在我座位旁邊的樓梯上，音樂會剛開始沒多久，他父子倆就嘀嘀嘟嘟講不停，我請他們音樂演奏的時候不要講話，小朋友聽不懂又坐不住，他父子倆又嘀嘀嘟嘟講不停，我請他們不要講話，要講話出去外面講，他卻回我說：「不爽可以不要聽啊！這是免費的，不然你花錢買票去別的地方聽啊！」。我想說聽音樂會，當台上正在演奏的時候不要講話，這不是基本的規矩嗎？這是對表演者的尊重，也是對其他聽眾的尊重。怎麼會有一個那麼年輕的爸爸講出這樣的話呢？他的觀念會怎樣影響到他兒子？
什麼叫做「規矩」？什麼叫做「文明」？守法、守禮，這不是基本道德嗎？《禮記·中庸》：「莫見乎隱，莫顯乎微，故君子慎其獨也」。 意指君子在獨處、無人監督時，仍然能謹慎嚴格約束自己的言行。規矩像像排隊、讓位、在公共場所輕聲細語，像日本人每看到十字路口，不管它有紅綠燈還是沒有紅綠燈，不管有人或者沒人，他一定會停下來看一下才開走，現在臺灣也有這樣的規定了；日本小學生在看到有人開車停下來給他們先過的時候，他們走過斑馬線以後一定會對開車的人敬禮，這就是規矩，知道怎麼尊重別人，他們是從小就開始教、開始做，難怪日本是先進國家，不是他們的人均收入高而已，是他們的文明程度、道德的程度較高，對人有基本的尊重。聽音樂會不講話是基本的規矩，自己若不曉得尊重別人，又要怎麼教自己的兒女們尊重別人呢？一個沒規矩又不曉得尊重別人的社會不是一個好的社會，規矩要從自己做起，還要教子女遵守規矩，才會有機會變成文明社會，先進國家。
