文／黃麗芬
苗栗客人，現下戴臺北市，現職係客語薪傳師，國小、國中、高中客語支援先生。（四縣腔）
前幾年仔，有政治人物喊講「母語愛在屋下學」，引起盡多批評。異多人認為這句話同語言傳承个責任𢱤分家庭，係毋負責任个講法。正經冷靜想看啊，母語本旦就係在家庭裡背自然學著个語言。毋過，現下个社會環境早就無共樣，大部分个家長自家都毋會講，又愛仰仔教？假使硬硬愛轉到「屋下教母語」个理想模式，結果長透係「無學，乜無教」，落尾麼人都毋滿意，乜無達著預定个期待。
本土語言流失，係時代个目汁。厥个問題，係社會變遷、教育制度同家庭語境共下改變所造成个結果。愛來怨怪，毋當面對現實，尋新个出路。
𠊎教國中生時，學生仔輒常講：「小學學了六年，還係聽毋識、講毋出。」教高中生時，佢兜又講：「學了八年（小學六年加上國中兩年）乜無學會。」恁樣个遺憾聽當多，除忒這兜回應以外，乜有恬恬仔打拚、繼續進步个學生仔。佢兜雖然試著有兜仔難，還係肯繼續學下去，恁樣个精神就係「客家精神」，值得肯定。
在高中課堂項，有幾儕學生仔從來無學過客語，佢兜選修个理由無共樣：有人想彌補同屋下世大人个語言斷層，有人單純想學看啊「客語係麼个」……。無論動機係麼个，𠊎總會鼓勵大家：「做得分你主動開嘴學个語言，就係有意義个語言。」𠊎輒常同學生仔講，一隻語言無可能在一年內學會，毋過做得在一年內學會「仰仔學」。只愛把扼著方法，語言就做得漸漸仔融入生活。
母語教學个推動，無應該泛政治化，乜無應該淨喊口號定定。實際个問題毋係在「愛教無」，顛倒在「仰仔教、麼人做得教、仰仔分學生仔肯學」。學校同社會該當共下承擔這份責任，毋好再過分家庭孤立，愛分母語重新行入生活。先生做得做个，就係用心教；學生仔做得著个，就係煞猛學，只愛𫣆都對得起自家，就係有意義个本土語傳承。
謠言同疑狐，就像溜苔同野草，總好生在有溼氣同濫泥个地方。唯有穩定、實在个行在教育這條路項，管佢係溜苔抑係野草，絕對生毋出來，無定還會開出靚靚个花來。語言个路長饒饒仔，只愛行過定著留下印跡，𫣆行个逐步都係分母語再生个希望！
華語
前些年，有政治人物喊說「母語要在家學」，引起不少批評。許多人認為這句話把語言傳承的責任推給家庭，是不負責任的說法。真的冷靜想想，母語本來就是在家庭裡自然習得的語言。不過，現今的社會環境早已不同，多數家長自己都不會說，又要怎麼教？如果一味要回到「家裡教母語」的理想模式，結果往往是「沒學，也沒教」，最後誰都不滿意，也沒有達到預定的期待。
本土語言流失，是時代的眼淚。它的問題，是社會變遷、教育制度與家庭語境共同改變所造成的結果。與其責怪，不如面對現實，尋找新的出路。
我教國中生時，學生常說：「國小學了六年，還是聽不懂、說不出。」教高中生時，他們又說：「學了八年（國小六年加上國中兩年）也沒學會。」這樣的遺憾屢見不鮮，除了這些回應之外，也有默默努力、持續進步的學生。他們雖然覺得有些難，仍樂意繼續學下去，這樣的精神就是「客家精神」，值得肯定。
在高中課堂上，有幾位學生從沒學過客語，他們選修的理由不一：有人想彌補與家中長輩的語言斷層，有人單純想學看看「客語是甚麼」……。不論動機為何，我總會鼓勵大家：「能讓你主動開口學的語言，就是有意義的語言。」我常告訴學生，一個語言不可能在一年內學會，但可以在一年內學會「怎麼學」。只要掌握到方法，語言就可以漸漸地融入生活。
母語教學的推動，不該泛政治化，也不該光喊口號而已。真正的問題不在「要不要教」，而在「怎麼教、誰能教、如何讓學生願意學」。學校與社會應該共同承擔這份責任，不要再讓家庭孤立，要讓母語重新走進生活。教師能做的，就是用心教；學生做得到的，就是努力學，只要我們都對得起自己，就是有意義的本土語傳承。
流言與疑心，就像青苔與雜草，總喜歡滋生在潮溼與泥濘之處。唯有穩定、踏實地走在教育這條路上，任它是青苔還是雜草，絕對長不出來，說不定還會開出漂亮的花來。語言的路很漫長，凡走過必留下痕跡，我們走的每一步都是讓母語再生的希望！
