文／張春燕
桃園市龍潭人，客語教支人員，這下戴在大溪，感謝邱鴻春先生指導客語寫作。（四縣腔）
倈仔講，退伍轉來第一隻計畫，係騎自行車環島。另外就係遽遽學會煮幾項仔家常菜。尞日兩子哀在屋下，七手八腳摎香噴噴仔个炒肉兜上桌，再加一盤青花菜，同鹹菜豬肉湯。兩菜一湯，係𠊎企在灶下脣，指導做出來个成果。
哈哈，原來煮食係恁簡單。佢一頭夾菜揤入嘴空，一頭暢靂靂笑咪咪仔講：這兜菜係𠊎炒个，暗晡夜洗碗筷，就毋係𠊎个事情哩！今晡日會擎鑊鏟煮兩盤菜，自動變灶下大腳士哩。
好恬恬仔腦膈肚愐起頭擺舊事，𠊎笑笑仔同佢講，阿媽若係知你會擎鑊鏟，不知會仰般想？ 記得你兜細个時節，𠊎同若爸都愛上班，𠊎有定一隻規矩，你三儕愛𢯭手做事，麼儕先轉屋下，就要先洗米煮飯，等𠊎轉來菜煮好，若爸乜轉屋哩。食飽夜愛撿揫洗碗筷、抹桌凳，這兜事頭係兩個阿姊，同你三儕逐暗晡照輪做个。
若阿媽有，「男仔人毋入灶下」个觀念盡深。佢看著兩個孫女，灶下洗碗筷，會阿腦兩個孫女恁乖，另擺嫁人就毋使愁，兜人个飯碗兜毋來。毋過若係看著你這孫仔在該洗碗，就會遽遽行兼去，同你講：「乖孫仔，你去看書，碗阿媽來洗！」
你總係講：「做毋得啦，等下吾姆看著，會分佢罵！」看你毋肯放手，若阿媽就斡頭行到廳下，面臭臭仔對𠊎講：你敢正經恁無閒？連洗隻碗就愛喊細孲仔洗！
有一擺𠊎載佢去長庚拿藥仔，在車肚道嘆講，時代無共樣哩！原來正結婚个大孫，就係你叔伯大哥，毋盼得餔娘長透工廠愛加班，佢就逐日跍在屋簷下，洗兩公婆該衫褲，老人家感覺恁樣不搭不膝，又敗勢講佢。包尾佢自家扐一隻石牯，放在新娘間个洗身間，希望佢在裡肚恬恬仔洗，毋好拿出來洗，分人看著恁祭衰人！讀到大學畢業，還同餔娘人洗底褲仔，實在前世無修，倈仔準心臼！
無想著佢無了解阿媽个心意，石牯放在洗身間徑手徑腳，第二日就摎石頭擲出外背去。若阿媽翻轉來怪孫心臼，佢唸唸唸唸講：仰會這下个細妹人，恁毋知規矩，恁毋曉得！這雖然係多年前个事情，若阿媽過身二十大零年，對𠊎來講就像昨晡日个事，過往个事情一直分𠊎難忘。
「 阿姆你愛啉一息仔酒無？」倈仔興蹀蹀仔問𠊎，將𠊎拉轉現實，看著倈仔恁歡喜，忽然間又有一隻畫面出現，另日倈仔討餔娘，做一个快樂个「煮夫」，落灶下煮食，該央時，家娘毋知會坐在飯桌前，緊搖頭緊唸：唉！這下个後生人仰會恁樣呢？祭衰人正得！
華語
兒子說，退伍後第一個計畫，是騎自行車環島。另外就是趕快學會煮幾道家常菜。星期天兩母子在家裡，手忙腳亂的把一道香噴噴的客家小炒端上桌，再加一盤青花菜，及鹹菜豬肉湯。兩菜一湯，是我站在灶台邊，指導做出來的成果。
哈哈，原來煮菜一點都不難嘛。他一邊夾菜塞進嘴裡，一邊高興笑著說：這些菜是我炒的，今天晚上洗碗筷，就不是我的事情囉！今天會拿鍋鏟煮兩道菜，自動升格成大廚了。
不知不覺腦海裡想起陳年舊事，我笑著跟兒子講，奶奶知道你拿起鍋鏟下廚房，不知道會怎麼想？記得你們小時候，我跟爸爸都要上班，我們家的規矩是，小孩也得幫忙做家事，誰先放學回到家，誰就先洗米煮飯，等媽媽回到家菜煮好，爸爸也差不多回到家了。飯後的清潔工作，要收拾碗筷、擦桌椅，這些是你和兩個姐姐，每天晚上輪流做的。
你奶奶有，「君子遠庖廚」的觀念根生蒂固。她看到兩個孫女，在廚房洗碗筷，會稱讚兩個孫女好乖，將來結婚就不用擔心，端不住別人家的飯碗。不過若是看到孫子在洗碗，就會急忙走過去說，乖孫，你去看書，碗奶奶來洗！
你總是講：不行啦，待會被我媽看到，我會挨罵的！看你不肯放手，你奶奶就轉頭走到客廳，生氣的對我說：「妳真的有這麼忙嗎？連洗個碗都要叫小孩洗！」
有一次我載她去長庚回診，在車上她嘆氣說，時代變了！原來剛結婚的大孫，就是你堂大哥，心疼老婆常常工廠要加班，他就每天蹲在屋簷下，洗兩夫妻的衣服，老人家感覺這樣成何體統，又不方便直說。後來她搬了個大石頭，放在新房的浴室裡，希望大孫在裡面偷偷洗，不要拿出來洗，讓人家看到真是太丟臉了！讀到了大學畢業，還跟老婆洗內褲，實在是丟人現眼！
沒想到他沒意識到奶奶的心意，石頭放在浴室礙手礙腳，第二天就把石頭丟到外面去了。你奶奶回過頭來怪孫媳婦，她叨唸著說，為什麼現在的女人，這麼不懂規矩，沒教養！這雖然是多年前的事情，你奶奶去世已經二十多年了，對我來說就像昨天的事，過往之事歷歷在目讓我難以忘懷。
「 媽媽你要喝點酒嗎？」兒子興沖沖的問我，將我拉回現實，看著兒子這麼開心，剎那間又有另一個畫面出現，哪天兒子結婚娶媳婦，做一個快樂的煮夫，進廚房烹調，那個時候，婆婆不知道會不會坐在餐桌前，邊搖頭邊唸：唉！現在的年輕人，怎麼會這樣呢？太丟臉了！
