文／江茂丹，苗栗縣南庄鄉客家人；現下戴高雄市（海陸腔）
逐日在屋門前出出入入，吂識注意著；在紅毛泥摎馬膠路合界，石礫仔了了、無麼个泥个細縫罅肚，毋知幾時好點點嗄生咧兩頭沙鼻弄天、吂知名个野草。
查咧手機仔厥解說恁樣講，一頭係豬嫲乳草另頭像係菩提樹秧。
想前胚後該兩頭野生草到底係麼个來歷；臨尾慢慢正愐起來，毋敢話係這恁多年以來，分主人放生个鳥仔，無斯原生種摎外來種个各種鳥雀類；輒輒會無目的飛入巷仔內，攀籬跳架企在人家个遮陽棚無斯電線楯項，飛上飛下抑係撞來撞去；無時閒嘰嘰喳喳吵耳塞窟，毋知係衰過噭眵還係暢樂唱歌仔。
該兜鳥仔可能在別位食了樹頂个果子，結果食落肚个果仁無消化，恁堵好屙出來帶等果仁个鳥屎，就跌落吾屋門前个地泥，正生出來个野草！
詩仙李白在厥一首詩作：【將進酒】裡肚有句話；「天生我材必有用」，意思係講天無絕人之路。一溜里來！無論對植物抑係人類，天公做事本成斯盡公當。
李白這句名詩經過千百年來，確實有影，係勸話人毋好失志个名言，到了今晡日全無走盞還已實用。換句話來講就係不論身分仰般卑微，分人看毋上眼个細人物；總愛往一隻方向煞猛打拚，乜有做出一番偉大事情个可能。
加拿大發明家亞歷山大‧格拉漢姆貝爾（：Alexander Graham Bell）傳下來个英文諺語：「生活雖然無情關上了大門，不過佢會另開溫柔个一扇窗。」也係鼓勵人愛立志个良言。
就像屋門前該兩頭野草，在當壞个環境中嗄無自暴自棄，還係保持樂觀進取个態度，開創自家無限光明个生路。
台灣四季氣候多變化，毋係人類有法度把扼摎改變个；凡事過好眼前正係最理想又最有贏面个生存之道。
有草就一定會有露水來滋養，無論下後會發生麼个事，就算在危險个環境，對一頭野草來講總會有機會，佢兜个生命正短短幾年甚至正幾隻月定定；佢兜無隨意放棄，頭那臥到愛高又愛高、尾椎翹上半天空。風神祿祿爭取有限个機會，面無改色勇敢面對未來無定準个挑戰，等待出頭該日到來。
植物都做得著，莫講自認係文明个𠊎俚人類。
華語
每天在屋門前進進出出，未曾注意到；在水泥地和柏油路交界，全是石礫、沒什麼泥土的細縫裡面，不知何時好端端卻長出兩棵賣弄風情、不知名的野草。
查了手機它的解說，一棵是馬齒莧另棵像是菩提樹苗。
想前猜後那兩棵野草到底是何方神聖；最後慢慢才臆測，十分可能是這幾年以來，被主人放生的鳥類，不然就是原生種或外來種的各種鳥雀；常常毫無目的飛入巷仔內，跳停在住家的遮陽棚或者電線桿，飛上飛下或是撞來撞去；無時無刻嘰哩呱啦吵人耳膜，不知道是可憐哭泣還是快樂唱歌。
那些鳥類或許在別的地方吃了樹上果子，結果吃進肚子的果仁沒消化，剛好拉出來帶著果仁的鳥屎，就跌落我家屋門前地面，才長出來的野草吧！
詩仙李白在他的一首詩作：【將進酒】裡面有句話；「天生我材必有用」，意思是說天無絕人之路。長久以來！無論對植物或是人類，老天爺做事本來就非常公平。
李白這句名詩經歷千百年來確實不虛，是奉勸他人不可失志的至理名言，到了今天全沒過時還相當實用。換句話來講就是不論身分怎樣卑微，讓人看不上眼的小人物；總要往一個方向努力打拚，也有可能做出一番偉大的事情。
加拿大發明家「亞歷山大‧格拉漢姆貝爾」傳下來的英文諺語：「生活雖然無情關上了大門，不過它會另開溫柔的一扇窗。」也是鼓勵人要立志的良言。
就像屋門前那兩棵野草，在惡劣環境中並無自暴自棄，還是心存樂觀進取的態度，開創自己無限光明的生機。
台灣四季氣候變化多端，不是人類有辦法把握和改變的；凡事活在當下才是最理想又最有勝算的生存之道。
有草就一定會有露水來滋潤，無論往後會發生什麼事，就算身歷險境對一棵野草來講總會有轉機，它們的生命才短短幾年甚至才幾個月而已；它們並沒輕言放棄，頭仰到要高又要高、屁股翹上半天。洋洋得意爭取有限機會，面不改色勇敢面對未來沒定數的挑戰，等待出人頭地那日來臨。
植物都做得到，莫言是自認文明的我們人類。
