文／鍾孝昇，國小教師、中壢客家人，這下戴中壢（四縣腔）
親愛个先生：
你恁久好無？這封信仔，係𠊎對天國寫分你个。雖然𠊎个肉身離開學校既經十年吔，毋過，𠊎還係摎你放在心肝肚記核核。
還記得該央時有人摎𠊎放在學校門口，屙屙糟糟又臭肨肨仔个𠊎，無人敢偎兼來。係你跍下來，用溫柔个聲同𠊎講：「毋使驚，豬仔乜係一條生命。」從該日開始，𠊎就有了名仔–「來福」，有了做得遮風抵水个屋仔、又做得食飽三餐，最重要个係，𠊎有了你兜惜𠊎。
你教學生仔愛仰般餵𠊎食摎拚掃豬欄……這兜照顧𠊎个方式。一開始學生仔棄嫌𠊎，驚𠊎會咬人，毋過日見日接觸，大家嗄變做𠊎个朋友。在下課時節，有人會偷偷仔分𠊎食番薯葉，有人會在作文課，寫𠊎个故事，還有人會畫𠊎个畫像，實在當感心。𠊎知𠊎既經毋係一條普通个豬仔，係大家个「福氣」。
毋過，年視年𠊎緊來緊老吔，身體乜越來越毋鬆爽，離開人間个日仔就會到吔。先生，你記得無？該日，你目汁濫泔，跍在𠊎个脣項，輕輕仔同𠊎講：「來福，承蒙你。」該央時𠊎有聽著你喊𠊎，毋過𠊎當悿吔，無法度再過應你一句。
離開你兜之後，你摎𠊎送到動物殯儀館火化，摎𠊎个金斗盎埋在學校花園肚，還用𠊎个名仔，摎花園安過新名「福園」。該隻花園，係𠊎个新屋，乜係𠊎摎你兜共下生活个所在。逐擺你行過，風吹花停動个時節，𠊎就知你又過來看𠊎吔。
你知無，十年來，𠊎輒輒發夢著你。在夢裡肚，𠊎看你企在花園脣，看等𠊎，笑笑仔同𠊎相借問。有一擺在夢肚，你摎𠊎講：「學校愛搬到新个地方吔，𠊎會帶你共下去。」聽著這句話，𠊎感動到目汁強強就愛流下來。原本𠊎想，𠊎可能會永久留在這位。無想著，你還記得𠊎，愛帶𠊎共下去新个校園。
其實，𠊎試著學校搬到哪都無要緊，淨愛你記得𠊎，𠊎就會永久在你个身邊。新學校係講有一隻旮旯角做得種花，𠊎就會變成花蕊下个草仔，恬恬仔同你摎學生仔做伴。
𠊎乜有發夢著「來玩」，佢講：「𠊎還做毋得上天國，還愛陪先生、學生仔。」𠊎笑笑講：「無要緊，你定定仔來，𠊎會等你，共下在天頂搞尞、看星仔。」
先生，感謝你一路里來个思念，感謝你分𠊎个生命變做恁有意義。你毋單淨係一個先生，乜係𠊎一生人个貴人。𠊎會一直守顧你，做你心肝肚个福氣。
敬祝你 平安快樂
你个豬仔 來福 敬上
天國第十年
華語
親愛的先生：
你好嗎？這封信，是我從天國寫給你的。雖然我的身體離開學校已經十多年了，不過，我還是將你在心裡牢牢記住。
還記得當時有人把我放在校門口，髒兮兮，臭臭的我，沒人敢靠近。是你蹲下來，用溫柔的聲音說：「別害怕，豬豬也是一條生命。」從那天開始，我就有了名字——來福，有了可以遮風避雨的屋子，有了可以吃飽的三餐，最重要的是，我有了你們給我的疼惜。
你教學生怎麼餵我及打掃豬舍…各種照顧我的方式。剛開始學生們嫌棄我、，怕我會咬人，但日復一日接觸，大家卻變成我的朋友。下課時有人會偷偷給我地瓜葉吃，有人會在作文課，寫我的故事，還有人會畫我的畫像，實在很窩心。我知道，我不再只是一隻普通的豬，而是大家的「福氣」。
不過，年復一年我越來來老，身體也越來越漸不舒服，離開人間的日子就要到了。老師，你還記得嗎？那天，你淚眼婆娑，蹲在我身旁，輕聲對我說：「來福，謝謝你。」那時我有聽到你喊我，不過我太累了，沒辦法再回應你一句。
離開你們之後，你把我送去寵物殯儀館火化，將我的骨灰壇埋在學校花園裡，還用我的名字，將花園重新命名「福園」。那個花園，是我新的家，也是我們一起生活的地方。每當你經過，風吹花動時，我就知道你又來看我了。
你知道嗎？十年來，我常常夢見你。在夢裡，我看見你站在花園邊，望著我，笑笑向我打招呼。有一次作夢，你對我說：「學校要遷到新的地方了，我會帶你一起去。」聽到這句話，我感動到眼淚幾乎就要流下來。原本我以為我會永遠留在這裡，沒想到，你還記得我，要帶我一起去新的校園。
其實，我想學校搬到哪裡都沒關係，只要你還記得我，我就會永遠陪伴你身邊。新校園若是有一個角落可以種花，我就會變成花下的草，靜靜陪伴著你和學生們。
我也夢見了來玩，牠說：「我還不能上天國，我要陪老師、陪伴學生。」我笑著說：「沒關係，你慢慢來，我會等你，一起在天上玩耍、看星星。」
老師，謝謝你一直以來對我的思念，謝謝你讓我的生命變得很有意義。你不只是一位老師，更是我一生的貴人。我會一直守護著你，做你心中的福氣。
祝你 平安喜樂
你的豬仔 來福 敬上
天國第十年
