文／李秀琴，苗栗客家人，中小學客語先生，這下戴台南市（腔頭：四縣腔）
這日同屋下人共下來到日本个箱根國家公園遶尞，這位个山光水色靚到耐毋得，有天然生成个蘆之湖、有名个溫泉同利便个交通，係一個一年透天都適合去遶尞个好所在，故所又分人安到「東方日內瓦」。
𠊎兜來到箱根湯本車站，愛盤車坐登山電車去強羅車頭，路項个地形彎彎斡斡，有幾下站因為山路忒嶇，電車無法度直直拚等上，高不將用「之」字形个登山方式來上山。首先，電車行到「之」字路段就停車，電車運轉手會對車頭行到車尾，將車尾該截變做車頭，再過駛去另一段電車道。就恁樣，電車運轉手上上下下幾下輪，盡有耐心个同電車駛到強羅車頭。
坐在車子裡肚看等電車順等「之」字形鐵道上山，電車盡像「行到水窮處」無法度再過行了，毋過退一步換隻方向，大路就在眼前出現，最尾還係做得到站，這分𠊎想著朋友阿芳个故事。
阿芳係顧問公司个專員，2008年底个金融風暴同全球个經濟搣到當慘，因為當多人客个資金轉毋過來，為著降低成本，提前解忒顧問公司个契約。阿芳个業績受著影響跌到貼貼，自家个資金乜在股市裡肚斷頭了，正經係「燈盞無油火難光，陂塘無水魚難養。」日仔強強會過毋下去了！毋過，阿芳無失志，顛倒退一步思考現下人客面對个係麼个困難？需要仰般个𢯭手？佢利用自家个專業知識，同人客𢯭手爭取政府个各項補助，還有補強員工个勞保同薪水系統。
「矮牯仔上樓梯——一步一步來。」慢慢仔人客个公司制度緊來緊拶腹實落，業務乜緊來緊穩定。老古人言講：「人勤地獻寶，人懶地生草。」阿芳受著人客个信任，人客紹介新人客，好名聲分佢在金融風暴裡肚企穩腳步，業績定定仔拈轉來了。
這幾年仔，輒常在財金雜誌項看著阿芳得著績優獎个相片，佢帶等謙虛个笑容接受採訪，記者問佢係仰般成功个？佢講自家就像布袋和尚同耕種人開示个詩作共樣：「手把青秧插滿田，低頭便見水中天。六根清淨方為道，退步原來係向前。」先同心定下來，退一步愐清楚淨有分人客先企穩腳步，自家正有機會。故所，佢選擇篤實，頭沉沉仔默默仔做，正有如今个好收成。
當初阿芳若係面對金融風暴，麼个應對方法都無个話，定著會畀沒忒。佢退一步轉隻方向再前進个想法，毋就同「之」字形登山鐵道共樣，最尾定著做得蹶上山頂。
登山電車繼續蹶上山，路項个風景就像電影共樣，一幕一幕放送，無共樣个高度，看著个風景乜無共樣。來到最尾站，企在闊野野仔个山頂看往下，箱根个自然風光十分餳人，連遠遠个富士山都看得著，分人个心情盡鬆爽。𠊎心肝肚愐：現下个阿芳應該乜在山頂欣賞佢个人生風景吔！
華語
這天和家人一起到日本的箱根國家公園遊玩，這裡的湖光山色美得不得了，有天然生成的蘆之湖，高人氣的溫泉和便利的交通，是個一年四季都適合去遊玩的好地方，所以又有「東方日內瓦」的美名。
我們來到箱根湯本車站，要轉車坐登山電車前往強羅車站，延路的地勢彎彎曲曲，有好多站因為山路陡峭，電車無法直線往上開，只好採取「之」字形的登山方式上山。首先，電車來到「之」字路段停好車，電車司機會從車頭走到車尾，將車尾那節變成車頭，再開往另一段電車道。就這樣，電車司機上上下下好幾回，非常有耐心的將電車駛往強羅車站。
坐在車箱裡看著電車順著「之」字形鐵道上山，電車好像「行到水窮處」無法再走了，不過退一步換個方向，大路就在眼前出現，最後還是可以到達目的地，這讓我想起朋友阿芳的故事。
阿芳是顧問公司的專員，2008年底的金融風暴將全球的經濟搞得悽悽慘慘，因為很多客戶的資金轉不過來，為了降低成本，提前將顧問公司的契約解約。阿芳的業績受到影響跌到谷底，自己的資金也在股市裡斷頭了，真的是「燈盞無油火難光，陂塘無水魚難養。」日子差點過不下去！不過，阿芳沒有因此喪志，反而退一步思考如今客戶面對的是什麼困難？需要怎麼相助？她利用自己的專業知識，幫客戶向政府爭取各項補助，還有補強員工的勞保和薪資系統。
「矮牯仔上樓梯——一步一步來。」慢慢的客戶的公司制度越來越實在，業務也越來越穩定。老古人言講：「人勤地獻寶，人懶地生草。」阿芳受到客戶的信任，客戶介紹客戶，好名聲讓她在金融風暴裡站穩腳步，業績慢慢地回轉了。
這幾年，時常在財金雜誌上看到阿芳得到績優獎的照片，她帶著謙虛的笑容接受採訪，記者問她成功的秘訣？她說自己就像布袋和尚為農夫開示的詩作那樣：「手把青秧插滿田，低頭便見水中天。六根清淨方為道，退步原來是向前。」先把心沈澱下來，想清楚唯有先讓客戶站穩腳步，自己才有機會。所以，她選擇篤實，低著頭默默的做，才有好收成。
當初阿芳若是正面迎向金融風暴，什麼應對方法都沒有的話，一定會被淹沒。她退一步轉個方向再前進的想法，不就和「之」字形登山鐵道一樣，最後一定可以爬上山頂。
登山電車繼續爬上山，路上的風景就像電影一樣，一幕一幕放送，不一樣的高度，看到的風景也不相同。來到終點站，站在開闊山頂往下看，箱根的自然風光盡收眼底，連遠方的富士山都看得到，讓人心情非常舒爽。我心裡頭想：現在的阿芳應該也在山頂欣賞她的人生風景吧！
